கட்டாயப்படுத்தி மாணவர்களின் விருப்பமின்றி உயர்கல்வியில் அவர்களை சேர்ப்பது சரியாக அமையாது - அமைச்சர்.

உயர்கல்வி படிப்பை தேர்ந்தெடுப்பதில் மாணவர்களின் விருப்பத்தை பெற்றோர்கள் நிறைவேற்ற வேண்டும் என்று தமிழக வேளாண் மற்றும் உழவர் நலத்துறை அமைச்சர் எம் ஆர் கே பன்னீர்செல்வம் கேட்டுக் கொண்டுள்ளார்.

தர்மபுரியில் தமிழக அரசு சார்பில் நான் முதல்வன் கல்லூரி கனவு என்ற மாணவர்களுக்கு வழிகாட்டும் நிகழ்ச்சி இன்று நடைபெற்றது.

மாவட்ட ஆட்சித் தலைவர் கி சாந்தி தலைமையில் நடைபெற்ற இந்நிகழ்ச்சியில், மாநில வேளாண் மற்றும் உழவர் நலத்துறை அமைச்சர் எம் ஆர் கே பன்னீர்செல்வம் கலந்து கொண்டு விழா பேருரை ஆற்றினார்.  அப்போது பேசிய அமைச்சர் "மாணவர்களின் உயர்கல்வியில் நல்ல வாய்ப்புகளை ஏற்படுத்தும் வகையில் தமிழக அரசு நான் முதல்வன் கல்லூரி கனவு என்னும் நிகழ்ச்சிகளை நடத்தி வருகிறது. 

இது போன்ற நிகழ்ச்சிகள் மாணவர்களின் வாழ்வில் திருப்புமுனையாக அமையும், நல்ல வாய்ப்பாகவும் அமையும்.  தமிழக முதல்வர் மாணவர்களின் எதிர்காலத்தின் மீது மிகுந்த அக்கறை கொண்டு அவர்கள் அனைத்து துறையிலும் முதல்வனாக திகழ வேண்டும் என்ற உன்னத நோக்கில் இந்த நிகழ்ச்சிகளை நடத்த உத்தரவிட்டுள்ளார்.

கல்வியில் முதல்வன், அறிவாற்றலில் முதல்வன், படைப்புத்திறனில் முதல்வன், சமத்துவமாக மற்றவர்கள் மதிக்கத்தக்க வகையில் மாணவர்கள் விளங்க வேண்டும். 

குறிப்பாக அனைவரும் பின்பற்றும் பண்பை கொண்ட மாணவனாக விளங்க வேண்டும். அனைவரையும் வழிநடத்தும் தலைமைத் திறன் கொண்டவராக மாணவர்கள் உயர வேண்டும். இதுபோன்ற உன்னத நோக்கங்களைக் கொண்டு நான் முதல்வன் என்ற தலைப்பில் இந்த விழிப்புணர்வு நிகழ்ச்சிகள் நடத்தப்பட்டு வருகிறது.

இந்த உயர்கல்விக்கு வழிகாட்டும் நிகழ்ச்சிகளை மாணவ, மாணவியர் சிறந்த முறையில் பயன்படுத்திக் கொண்டு உயர்கல்வியை பெற வேண்டும்.

தர்மபுரி மாவட்டம் பொருளாதாரத்தில் பின்தங்கிய மாவட்டம் என்ற பெயரில் இருந்தாலும், இந்த மாவட்டத்தில் அரசு பள்ளிகளில் பயின்று இந்திய ஆட்சிப் பணி, இந்திய காவல்துறை பணி உள்ளிட்ட உயர் பணிகளில் பலர் சென்றுள்ளனர்.  

மாணவர்களுக்கு வழிகாட்டும் இந்த நிகழ்ச்சியில் 8 தலைப்புகளில் சிறந்த பேராசிரியர்கள் உயர் கல்வி வாய்ப்புகள் குறித்து உரையாற்ற உள்ளனர். அனைத்து மாணவ மாணவிகளும் இந்நிகழ்ச்சியை பயன்படுத்தி எதிர்காலத்தில் தாங்கள் தேர்ந்தெடுக்கும் துறைகளில் முதல்வனாக வர வேண்டும்.  உயர்கல்வியில் மாணவர்கள் தேர்ந்தெடுக்கும் துறைகளை பெற்றோர்கள் ஏற்றுக் கொள்வது சிறந்தது.  கட்டாயப்படுத்தி மாணவர்களின் விருப்பமின்றி உயர்கல்வியில் அவர்களை சேர்ப்பது சரியாக அமையாது. என்றார் அமைச்சர்.

பன்னிரண்டாம் வகுப்பு முடித்த மாணவர்களுக்கு கல்வி வழிகாட்டும் வகையில் அமைந்த இந்த நிகழ்ச்சியில் பல்வேறு பேராசிரியர்கள் பங்கேற்று உயர்கல்வியை தேர்ந்தெடுப்பது குறித்து கருத்துரைகளை வழங்கினர்.  தர்மபுரி மாவட்டத்தை சார்ந்த 12ஆம் வகுப்பு முடித்த சுமார் 1600 மாணவர்கள் 

இந்நிகழ்ச்சியில் பங்கேற்றனர்.  மாற்றுத்திறன் கொண்ட மாணவர்களும் இந்நிகழ்ச்சியில் பங்கேற்றனர். அவர்கள் அறியும்படி ஆசிரியர்களைக் கொண்டு விளக்கங்கள் அளிக்கப்பட்டது.